(žórło: www.dresden.de)
Našemu towarstwje je so poradźiło w sobudźěle z městom Drježdźany serbsku pěstowarsku skupinu w jednej pěstowarni w nošerstwje města etablěrować.
W nalěću 2013 je so na Geisingskej 25 w Drježdźanach Strěžin (Striesen) kontainerowa pěstowarnja wotewrěła. Serbski rěčny profil widźi so tu jako kulturelne zetkawanje a zasadne počesćowanje wjacerěčnosće. Serbšćina je poskitk za wšitke pěstowarske dźěći tuteje pěstowarnje (2 do 6 lět). Wutrobnje witani su wosebje tež dźěći bjez znajomnosćow serbskeje rěče, kotrymž chcemy dwurěčnosć zbližić.
Z tym powjetši so poskitk serbskorěčneho zastaranja w Drježdźanach na cyłu předšulsku starobu. Serbskorěčny poskitk steji wšěm dźěćom našeje pěstowarnje k dispoziciji. Dalše městna su swobodne. Potrěba móže so pola měšta Drježdźany přizjewić.
Wot spočatka januara 2018 skutkuja w dźěćacym dnjowym přebywanišću na Geisingskej w Drježdźanach štyrjo Serbja. Kubłarka Nadja Lebzec ma třoch praktikantow poboku. Hižo dlěje dźěła tam we wobłuku praktikuma dźiwadłowa pedagogowka Teresa Stübnerec. Hakle něšto dnjow zaběra so w zarjadnišću sorabistka Sylvia Berensmeierec z dźěćimi we wobłuku serbskorěčneho kubłanja. Wona chce po móžnosći cyłe lěto praktiske nazhonjenja w pěstowarni zběrać a tak zwěsćić, hač je powołanje kubłarki za nju perspektiwa. Wjacore měsacy trajacy praktikum wukonja w zarjadnišću tež Syman Šołta. (žórło: SN/MiR)
Kontakt:
Eigenbetrieb Kindertageseinrichtungen Dresden, Kita Geisingstraße
Web: http://www.dresden.de/de/leben/kinder/tagesbetreuung/kita-verzeichnis.php
(za pytanje pod Träger: "Eigenbetrieb Kindertageseinrichtungen Dresden" a pod Ortsamt: "Blasewitz" wupytać; w lisćinje namakaće "Geisingstraße 25" na druhim městnje)
Pokiw: Hdyž přizjewiće potrěbu pěstowarskeho městna za Waše dźěćo přez staršiski portal města Drježdźany, prosymy Was tež towarstwo Stup dale z.t. informować, zo bychmy sej přehlad wo ličbje zajimcow zachowali (stup.dale@googlemail.com).